Ôs veer Gangmakers hebbe de Vastelaovend in eur blood en zien echte vastelaovesgekke. ’t Boerebróedspaar Pascal en Eveline Willems-Dekkers woënt op de Meidoornlaan in ’t Maasveld same mêt eure zoon Max (4), dochter Isa (2) en eur twië katte Simba en Kenzo. Bróedegôm Pascal (34) is gebaore in ’t gashóes van Vênlo. Hae is opgegreujd op de Nachtegaalsjtraot ônger ôppe Hei. Pascal is de zoon van John en Lia Willems-Gielen en is ’t jôngere breurke van broor Remco (35). Pascal is in ’t dageliks laeve wageparkinsjpekteur beej EuroMaster in Bliërick. Boerebróed Eveline (37) is ouch gebaore in ’t gashóes van Vênlo, maar haet de iërste 4 jaor van zien laeve op de Mulgouwsingel baove ôppe Hei gewoënd en is verder opgegreujd op de Geldersebaan in de St. Josephparochie. Eveline is de dochter van Piet en Annegré Dekkers-Slaats. Eveline haet ’n broor Martijn (45) en is in ’t dageliks laeve wêrkzaam as HR-meiwêrkster beej Redcare Pharmacy in Zaerum.

Pascal en Eveline zien al 13 jaor same, woëvan 9,5 jaor getrouwd. Bróedegôm Pascal haet as hobbie taofeltennisse beej T.T.C. in Tegele en kiék ouch gaer nao ’t voetballe van Ajax op d’n tilleviezie. Ôs Bróed Eveline is muziekaal aangelag en sjpeult al 25 jaor klarinet. Eveline duit det al 23 jaor beej de Holtmühler Blaoskepèl. In ’t verleeje hebbe Pascal en Eveline ouch nag meziek gemak beej Oeleskepèl Tegels Blood. Verder zien Pascal en Eveline ouch lid en aktief vur sjötterie St. Martinus. Eveline is heej jaorelangk penningmeister gewaes. Pascal zien grôtste hobbie en passie is ouch Sjtichting Kingerverkansiewêrk Tegele. In al die jaore det hae heej lid van is, haet hae mênnige aktievieteit mei georganiezeerd of is hae as leider meigewaes op kamp. Op ’t moment is Pascal veurzitter van Sjtichting Kingerverkansiewêrk Tegele.

As Getuuge hebbe Pascal en Eveline vur Remco en Fabiënne Willems-Klaassens gekaoze. Jao, geej laes ’t good de Getuuge hebbe dezellefde achternaam as ’t Bróedspaar! Bróedegôm Pascal en Getuuge Remco zien dèn ouch breurs van mekaar. Remco (35) is gebaore in ’t gashóes van Vênlo as zoon van John en Lia Willems-Gielen. Remco zien jônger breurke is dus ôzzem Bróedegôm Pascal. Zeej greujde same op in de Nachtegaalsjtraot ônger ôppe Hei. In ’t dageliks laeve is Remco projekbegeleider en houf bedriéfsburo beej Wijnen Bouwgroep in Someren. Fabiënne (29) is gebaore ôppe Ruiver woë ’t 3 jaor gewoënd haet, maar is opgegreujd op de Amethist in Vênlo-Zuid. Zien elders

zien Wil en Brigitte Klaassens-Simons en ’t haet ’n aajere zus Femke (31) en ’n jônger zuske Fleur (27). Fabiënne is wêrkzaam as verpleegkundige op de aafdeiling chirurgie in ’t gashóes VieCuri in Vênlo. Remco en Fabiënne woëne mêt eure zoon Sven (5), dochter Laurie (2) en euren hôngk Lexy op ’t Keuninginneplein in Belvend. Remco klus gaer in hóes, hèlt van ’t sjpeule van bordsjpelle en ’t drejje van plaetjes. Fabiënne freubelt gaer, luës op tiéd ’n book en bak ouch gaer get lekkers. Allebei zien zeej lid van Sjtichting Kingerverkansiewêrk Tegele. Remco is heej al 20 jaor vreejwilliger, woëvan 12 jaor as besjteurslid en de lêtste 8 jaor is hae heej penningmeister. Fabiënne is heej aktief as vreejwilliger. Remco en Fabiënne hebbe zich ouch beej ’t Kingerverkansiewêrk liëre kênne en zien al 8 jaor same, woëvan 6 jaor getrouwd. Wat nag leuk is öm te weite, is det de pap van Pascal en Remco, John, in 2000 prins John III wáas beej ôs zustervereiniging V.G. De Beerpiëp en det euren opa Henk

Willems jaorelangk lid is gewaes van de Boerejoekskepèl.

As Jeugboerebróedspaar 2025 hebbe weej dit jaor wir ’n geweldig duo gevônge. Bróedegôm Max Verlinden is 11 jaor en woort gebaore op 13 miërt 2013 in ’t Vênlose gashóes. Max is de zoon van Rob en Caroline Verlinden-van Ham. Hae woënt same mêt zien elders en zuske Emma (6) op ’t Drunselhof in de St. Josephparochie in Tegele. Max kiep in JO13-1 beej Sjportklöp Irene. Verder geit hae gaer nao wêdsjtrieje van VVV kiéke, is hae groët fan van PSV en van Formule 1. Hae geit gaer nao Toverland en is zeker ouch mêt zien kammeräöj lekker bóete op de plak beej ö-m in de buurt te vinge. Max kênt zien Brüdje Puck via sjoël. Max zit in groep 8 beej juffrouw Fiona en juffrouw Sanne op basissjoël Het Maasveld. ’t Viëre van de Vastelaovend is Max neet vraemp, want det doon zien elders ouch gaer. Pap Rob is namelik lid van de Raod van Ellef van V.G. D’n Oeles en is dao aktief binne de Kemissie Merchandise en de Optôchkemissie en mam is aktief binne de Kemissie Bals. Ouch óet de vrindegroep van zien pap en mam, ‘Zaat op ’t Ei’, zien al versjillende vastelaoveshoëghede gekômme. Hae haet de Vastelaovend dus mêt de paplaepel ingegaeve gekreege!

Ôs Brüdje Puck Beurskens is 11 jaor aad en woort gebaore op 14 november 2013 in ’t Vênlose gashóes as dochter van Geert Beurskens en Hanneke van Gerven. ’t Haet nag ’n jônger breurke Baer (9). Puck woënt mêt zien gezin op de Vreejenbrookwaeg op de grens tösse Tegele en Vênlo. Puck is ’n sjportief maedje, want ’t hokkiejt in MO12-2 beej Hokkiejklöp Delta Vênlo. Verder sjteit Puck geregeld in de keuke öm get te bakke, maar ’t is ouch kreejatief en hèlt van knutsele, zoë-as sieräöj maake en hout bewêrke. Verder

wandelt Puck ouch gaer mêt eur hundje Teuntje. Puck haet mêt zien elders en breurke en de ganse vrindegroep ‘Tiéd zat’ al dök mêt de Bliërickse en Vênlosen Optôch meigedáon, dus ouch beej Puck zit ’t Vastelaovend viëre in ’t blood. Puck geit, net wie Bróedegôm Max, nao sjoël in groep 8 beej juffrouw Fiona en juffrouw Sanne op basissjoël Het Maasveld. Same hebbe zeej d’r hiël vuël zin in öm de Jeugvastelaoveskèr beej De Boereraod te trêkke.

Puck en Max zulle dit jaor op zaoterdig 22 fibberwarie, van 17.30 oor toet 19.00 oor, in d’n aaje zaal van de Haandertboerderie eur resepsie haaje. Aansjlóetend is öm 19.30 oor ouch de resepsie van de groëte Gangmakers Pascal & Eveline en Remco & Fabiënne. Tiédes de resepsies zal d’r meziek zien van ôs Boerejoekskepèl en DJ Ôppuh Ruiver.

“Tegele, laot dich zeen!”, det zulle weej mêt dees zes Gangmakers zeker doon! Viër de Vastelaovend gezellig mêt ôs as Boere mei en loup êns binne beej de Haandertboerderie of in de kefees ôppe Hei!

Vastelaovend Same! Roy Ekart (veurzitter) en Teddo Peulen (Boerevader),

V.V. De Boereraod van de Hei.