‘t Begin
In ’t jubieleejumjaor 1977 ôntsjtông de oprichting van ôs Boerejoekskepèl. In ’n algemeine leejevergadering kwaam ’t toet de beneuming van Hay Thurlings toet veurzitter en Boerevader en daomei op 15 april 1977 toet de oprichting van de Boerejoekskepèl. De oprichting van ’n eige meziekgezelsjap verbônge aan De Boereraod woort toentertiéd gezeen as ‘finansjeel riskant’, maar bleek nao ’nnen tiéd ’nne gôlde greep. In ’t iërste uniform woort op ’n ôngerling treffe van de vereiniging in sjpeultuin Klein Zwitserland de veurduip belaef. ’n Ziër suuksesvol iërste optraeje meug waal gezag waere. En d’r zôlle d’r nag vuël vollege…
De wors beej ’t boeremoos
’t Besef beej initiatiefnimmer Hay Thurlings en zien Besjteur in 1977, det Vastelaovend viëre zônger meziek net zoëget wáas as ‘boeremoos aete zônger wors’, is de Boerejoekskepèl zônger miër ’n beweeze feit gebleeke. De derde geleding van de Tegelse vastelaovesvereiniging, ellef jaor iërder waare de Dansgroepe aan ’t Besjteur en de Damesgarde toegevoeg, bepaolde ônger angere ’t gezich van de vereiniging beej iddere gelaegenheid det d’r nao bóete woort getraoje. Det geldt toet op d’n daag van vandaag. Idders kiër wenniër de iërste toëne van de binnekômmer ‘Weej zien de Boere van de Hei’ klingke, wêt ’t publiek: “Nôw sjtijg de sjtumming nao ’n hoëgtepunt!” Vur iddere gangmaker, idder Raodslid en idder lid van de Damesgarde is ’t ’n geweldige ervaring öm same mêt zôn kepèl de Vastelaovend óet te draage.
