V.V. De Boereraod is, öm ’n Duits waord te gebróeke, ’n echte ‘Traditionsverein’. Det vingse trük in de sjtatuute van 1955, woë-in ônger miër ’t vollegende opgeteikend sjteit:
‘V.V. De Boereraod sjtêlt zich ten doel, de organiezaasie en bevordering van ’n gepaste vastelaovendviëring in Tegele en mêt name in de wiék ‘ôppe Hei’.’
De vereiniging perbeert dit doel te bereike door ’t organiezeere van en deilnimme aan fiëstelikke vastelaovesbeejeinkômste, ’t deilnimme aan en aktieveere van ’nne jaorlikse vastelaovesoptôch in Tegele, ‘t organiezeere en aktieveere van ’n jaorlikse Boerebróelef in de wiék ‘ôppe Hei’ en ’t bevordere van vastelaovesúutinge, die ’nne verantwaorde, plezerige en volkseige vastelaovendviëring in Tegele beouge.
De vereiniging meug dèn intösse ’nne seniorelaeftiéd bereik hebbe, maar zeej sjteit nag altiéd miër dèn oëts vur de Tegelse Vastelaovend. ’t Viëre en organiezeere van úut zich hiël sjpesiefiek in de tradiesie van de Boerebróelef. Nao d’n oorlog wáas de H. Hartparochie de plaats in Tegele woë in rap tempo nieje hüs, sjtraote en buurte versjeene rôngköm de aaje kerne van ‘ônger ôppe Hei’ en ‘baove ôppe Hei’. In daen tiéd wáas de gemeinsjapszin van ’n sjtraot of wiék zoë sjterk, det ’t vanzellefsjpraekend wáas det dees minse zich vereinigde. De buurtvereiniginge sjoote dèn ouch as paddesjteul óet de grôngk. In daezellefden tiéd (1951) wáas de belofte opgeheeve die Tegele tiédes de oorlogswingkter van 1944 had gedáon, namelik öm 25 jaor gênne Vastelaovend te viëre as de oorlogsdreiging aan ôs dörp vurbeej zôl gaon. Daomei wáas op 25 jannewarie 1955 de waeg vreej öm in de sjterk greujende Heierse gemeinsjap, naeve de versjillende hechte buurtvereiniginge en de groëte hermenie, ouch nag ’n teniëlvereiniging, ’n reisvereiniging en ’n vastelaovesvereiniging op te richte. Ömdet in 1937 ’t gebróek al wáas ôntsjtaon öm in ’t oëstelikke deil van de gemeinte Tegele mêt de Vastelaovend ’n Boerebróelef te viëre, woort d’r op deze ingesjlaage waeg verder gegáon en zoog V.V. De Boereraod ’t laevesleech. De Boerebróelef ôppe Hei zôl gaon óetgreuje toet ’n Tegelse tradiesie, die mêt vuël leefde in sjtand wuërt gehaaje. De vereiniging têlt taengeswaordig ôngeviër 250 leeje.
