Vastelaovend beej De Boereraod 2026

Ôs veer Gangmakers hebbe de Vastelaovend in eur blood en zien echte vastelaovesgekke. ’t Boerebróedspaar dit jaor is uniek, want zeej woëne allemaol örges angers. Ôzzem Bróedegôm Stijn Clabbers woënt op de Hoëgsjtraot in Tegele. Bróedegôm Stijn (26) is gebaore in ’t gashóes van Vênlo. Hae is opgegreujd op de Hoëgsjtraot woë hae nag sjteeds woënt. Stijn is de zoon van Leon en Mariska Clabbers-Wilms en is de aajere broor van Jur (24). Stijn is in ’t dageliks laeve wêrkzaam as HR-meiwêrker beej Hessing Supervers in Zaerum. 
 

Boerebróed Maya Slaats (25) is ouch gebaore in ’t gashóes van Vênlo op 11 augustus 2000 en is opgegreujd op de St. Rochussjtraot op Sjteyl. Maya is de dochter van Louis Slaats en José Arts. Maya haet ’n twiëlingzus Inca (25) en is in ’t dageliks laeve wêrkzaam as finansjeel meiwêrkster beej de Hermans Groep woëbeej ’t zich focus op de finansjeele admieniesjtraasie van Verkansiepark Breebrônne en de euverkoepelende organiezaasie. Ouch hellep ’t nag waal êns óet op de vloer beej Ballorig Vênlo, wat ouch ’n ôngerdeil is van de Hermans Groep. 

 

Stijn en Maya zien al 2 jaor same. Bróedegôm Stijn haet as hobbie voetbal, meziek, laeze of kaoke. Ouch duit hae gaer leuke dinger mêt zien vrinde zoë-as ’t bezeuke van kônzerte, fiësjes viëre of ’n hepke aete en get dringke! En netuurlik zien grôtste hobbie: De Vastelaovend in Tegele! 

  

Naeve zien hobbies mak Stijn ouch nag gaer tiéd vreej vur ingkele vereinigingsaktievieteite. Zoë is hae al 9 jaor lid van V.G. D’n Oeles, det is vur de meiste ônger ôs gên niejs. Hae wáas heej zellefs Jeug-adjudant in 2011! Stijn is ouch aktief beej Kingerverkansiewêrk Sjteyl, zit in ‘t besjteur van de nieje Tegelse Revue en is nag altiéd lid van TSC Irene, woëveur Stijn op ’t moment get minder aktief is! 

  

Ôs Bróed Maya hèlt van laeze, LP’s verzaamele en alles wat mêt eure vrindegroep te maake haet. Verder dringk ’t gaer pilskes beej kefee Quatre Bras. Daobeej is Vastelaovend ouch ’n groëte hobbie van Maya en is ’t altiéd al erg op tiéd bezig mêt ’t verzinne van ’n niej pekske. Maar… det haet ’t dit jaor neet nuëdig! Maya is ouch al 10 jaor betrokke as leiding beej Kingerverkansiewêrk Sjteyl. Maya wuërt ouch waal de mooder van de vrindegroep genump. Nou… dèn passe ouch good beej De Boereraod! 

 

As Getuuge hebbe Stijn en Maya vur Mick Quaring en Fleur Tomlow gekaoze. Mick (23) is gebaore in ’t gashóes van Vênlo as zoon van Joost en Suzanne Quaring-Janssen. Mick zien aajere broor is Dion (24). Zeej greujde same op in de Maassjtraot in ’t sjoënste plaetske aan de Maas, namelik Sjteyl. In ’t dageliks laeve is Mick nag bezig mêt zien aafsjtudeerjaor van zien sjtudie ôngernimmersjap & retailmanagement aan de HAN in Numwaege. Daonaeve wêrk hae ouch nag ’n paar eurkes in de waek beej 8vance in Vênlo. Mick is op ’t moment lid van de Jeugkemissie van V.V. De Kaetelaers en al 9 jaor aktief as leider/vreejwilliger beej Kingerverkansiewêrk Sjteyl. Fleur (22) is gebaore in ’t gashóes van Vênlo as dochter van Bart en Inge Tomlow-Heyman. ’t Haet gên breurkes of zuskes, maar waal ’n hundje Saartje. Fleur is wêrkzaam as opticien en toekômstig kôntaklenssjpesjalis beej Xie Eyewear in Vênlo. Fleur woënt mêt eur elders op de Mungksjtraot in Tegele. Mick is gaer sjportief bezig in ziene vreejen tiéd, zoë-as mêt voetballe mêt zien vrindeteam TSC Irene 7, fitness en hardloupe. Verder geit hae gaer nao de ArenA Ajax supporte en is op zôndig de Formule 1 kiéke mêt vrinde vaste prik. Fleur duit aan hokkieje beej Delta Vênlo in Dames 4. Verder vingk hèt ’t leuk öm gezellig mêt de vrinde op páad te gaon. Zoë-as beej eur jaorlikse vrindeweekend of op de vriédigaovend woëbeej d’r netuurlik drengkskes waere gedrôngke. Ouch is Fleur aktief as leidster/vreejwilliger beej Kingerverkansiewêrk Sjteyl.  

As Jeugboerebróedspaar 2026 hebbe weej dit jaor wir ’n geweldig duo gevônge. Bróedegôm Siem Stapel is 11 jaor en woort gebaore op 22 juni 2014 in ’t Vênlose gashóes. Siem is de zoon van Daan en Inge Stapel-van der Velden. Hae woënt same mêt zien elders en breurke Jesper (7) op de Hoëgsjtraot in Tegele. Vanoét zien hóes is hae zoë op sjoël, want hae zit in groep 8 op basissjoël Het Maasveld, same mêt zien Brüdje Jolie de Bitter beej juf Sanne. Zeej zitte al vanaaf groep 4 beej mekaar in de klas. In groep 1 t/m 3 haet Siem op basissjoël De Schalm op Sjteyl gezaete, aangezeen hae mêt zien elders toen nag op de Pacellilaan op Sjteyl woënde.  

Siem is ’n aantal kiër in de waek beej TSC Irene te vinge, woë hae in de JO12-1 voetbalt mêt ziene pap as ein van de trainers. As hae dao neet te vinge is, dèn is hae dök boéte te vinge in ’t parkje of op ’t Ovaal. Lekker voetballe of jachseizoen sjpeule mêt vuël klas- en buurtgenootjes. Thóes vingk hae ’t heerlik öm ’n poetje Fifa te sjpeule, woëmei hae altiéd wilt winne netuurlik!. ’t Leefste wilt Siem iddere wedsjtriéd van Ajax zeen, dao is hae ’nne groët fan van. Naeve de wêdsjtrieje van Ajax, kiék hae ouch gaer nao angere voetbalwêdsjtrieje, same mêt ziene pap.  

Ôs Brüdje Jolie de Bitter is 12 jaor áad en woort gebaore op 13 december 2013 in ’t Vênlose gashóes as dochter van René en Rianne de Bitter-Simons. ’t Haet nag ’n aajere zus Kiki (17) en broor Noah (14). Jolie haet in Baolder zien jôngere jaore doorgebrach. Zien pap en mam wôlle gaer trük nao Tegele en daoröm zien zeej verhóes nao Sjteyl woë zeej al ach jaor woëne op de Waterloosjtraot. Jolie woënt dao mêt ziene pap René, mam Rianne, zus Kiki, broor Noah en eur twië hundjes Bella en Jax.  

Jolie geit nao sjoël op basissjoël Het Maasveld woë ’t ouch ziene bróedegôm Siem haet liëre kênne in groep 4. Nao sjoël is ’t altiéd drök mêt danse. ’t Duit klassiek ballet, hiphop en modern beej de danssjoël van Dorris Titulaer in de sjtad. Dao is Jolie ouch drök mêt liëre vur de exames vur klassiek ballet beej de Royal Academy of Dance en haopelik haet ’t zien iërste beroepsexame in Eindhoven in ’t veurjaor.  

 

Verder vingk Jolie ’t hiël leuk öm lekker te knutsele en te sjildere. Zien iërste reejaksie toen ’t woort gebêld öm same mêt Siem Jeugboerebróedspaar te waere, wáas det ’t as ’nne gek rôngksjprông door de hóeskamer en ’t wôl det metein deile mêt zien zus Kiki, ömdet die det superleuk zôl vinge vur ö-m.  

Jolie en Siem zulle dit jaor op zaoterdig 7 fibberwarie, van 17.30 oor toet 19.00 oor in de Hermeniezaal eur resepsie haaje. Aansjlóetend is van 19.30 oor toet 21.00 oor ouch de resepsie van de groëte Gangmakers Stijn Clabbers & Maya Slaats en Mick Quaring & Fleur Tomlow.  

 

“Wat ein theater!”, det nimme weej mêt dees zes Gangmakers zeker serieus! Viër de Vastelaovend gezellig mêt ôs as Boere mei en loup êns binne beej de Haandertboerderie, Hermeniezaal, de kefees ôppe Hei of zellefs in d’n Doolhaof! 

 

Vastelaovend Same!