Beste vastelaovendviërders van Tegele, Sjteyl en de Hei,

Ôs veer Gangmakers hebbe de Vastelaovend in eur blood en zien echte vastelaovesgekke. ’t Boerebróedspaar Boy Rooskens en Fenne Probst woënt op de Broeklaan in de St. Josephparochie same mêt eur dochter Lux (6) en zoon Kiy (3 jaor) én eur hundje Jaerke. Boy (32) is gebaore in ’t gashóes van Vênlo, maar de iërste 2 jaor van zien laeve is hae opgegreujd op de Mungksjtraot toen zien elders nag kefee de Sjportbar hadde. Daonao haet Boy toet zien 16e op de Kêrkhaoflaan gewoënd öm óetintelik nao de Plechelmussjtraot in de St. Josephparochie in Tegele te verhóeze. Boy is de zoon van Theo en Nicole Rooskens-Peters. Boy is in ’t dageliks laeve opticien, kôntaklenssjpesjalis en bedriéfsleider beej Oogwereld Philip in Asten. Boerebróed Fenne (33) is ouch gebaore in ’t gashóes van Vênlo, maar opgegreujd op de Populiersjtraot net vurbeej ’t Brook. Fenne is de dochter van Hans en José Probst-Nijssen. Fenne haet ’n aajere zus Gemma (38) en is in ’t dageliks laeve wêrkzaam as opticien beej Xie in Vênlo.

Boy en Fenne zien al 15 jaor same. As echte vastelaovesviërder haet Fenne ’nnen dúudelikke lingk mêt De Boereraod. Fenne haet in ’t verleeje namelik 6 jaor lang beej de Dansgroepe van De Boereraod gedans.

Bróedegom Boy mak gaer meziek mêt zienem tuba beej Joekskepèl Petatte Nelke en Bróed Fenne is lid van de Nelkes. Bóete det Boy dus aktief is as muziekant, is hae beej de joekskepèl ouch sungk vurrig jaor de penningmeister. Boy duit gaer aan hardloupe en haet vur twië jaor trük de marathon van Amsterdam geloupe en aafgeloupe jaor de kusmarathon in Ziëlangk. In ’t verleeje voetbalde Boy beej de hiëre van Sjportklöp Irene net wie ôs Brüdje Fenne dit deej beej de dames. Voetballe duit Fenne nag sjteeds, maar nôw beej de dames van HBSV in Hout-Bliërick en van wandele hèlt Fenne ouch waal.

As Getuuge hebbe Boy en Fenne vur Falke van Cleef en Elles Gubbels gekaoze. Zeej zien same al jaore bevrind en vinge ’t keitôf öm mêt eur as Gangmakers veurop te gaon! Falke (32) is gebaore in ’t gashóes van Vênlo as zoon van Ron en Marleen van Cleef-Rooskens. Jao, geej zeet de naam Rooskens nôw al twië kiër trük in dit sjtök, want Falke en Boy zien bóete beste vrinde ouch mekaars naeve! Falke is waal 5 daag aajer as Boy! Falke haet nag ’n aajere broor Martijn (34) en ’n jônger zuske Renske (28). Zeej greujde same op in de Wilderbaeksjtraot in de St. Josephparochie. In ’t dageliks laeve is Falke in opleiding beej Willems Bouwbedriéf in Vênlo. Vurhaer wáas Falke pliesie en zoot hae in de beveiliging. ’n Carrièreswitch dus! Elles (33) is gebaore ôppe Ruiver op de Gouveneur van Sonsbeecklaan woë hèt ouch opgreujde. Zien elders zien Peter en Ine Gubbels-van Maris en ’t haet ’n aajere broor Niek (37). Elles is wêrkzaam beej Stufkens Hoorcentrum in Vênlo. Falke en Elles woëne mêt eur zeunkes Noam (6) en Ted (2) op de Hoëgsjtraot in ’t centrum van Tegele. Falke sjpeult op de träöt beej Joekskepèl Petatte Nelke en haet in ’t verleeje ouch altiéd gevoetbald beej Tiglieja en Sjportklöp Irene. Van dees lêtste vereiniging is hae nag altiéd lid. As hobbie geit Falke ouch gaer klumme in de Boulderkêrk in Vênlo. Elles haet vrúuger ouch beej de dames van Ruiver en Sjportklöp Irene gevoetbald en duit dit nôw same mêt Bróed Fenne beej de dames van HBSV in Hout-Bliërick. En jao… ouch Elles ‘wanjelt’ gaer! Falke en Elles zien al rúum 10 jaor same.

As Jeugboerebróedspaar 2024 hebbe weej dit jaor wir ’n geweldig duo gevônge. Bróedegôm Teun Brouwer is 12 jaor en woort gebaore op 14 december 2011 in ’t Vênlose gashóes. Teun is de zoon van Koen Brouwer en Marsha Janssen. Hae woënt same mêt zien elders en zuske Saar (6) op de Hoëgsjtraot in Tegele. Teun kiep in JO13-4 beej Sjportklöp Irene. Verder geit hae gaer mêt ziene pap nao wêdsjtrieje van VVV kiéke en volleg hae van VVV alles op de voot. Teun sjpeult gaer op ziene playstation, maar is zeker ouch mêt zien kammeräöj lekker bóete in ’t Maasveld te vinge. Hae kênt zien Brüdje Pleun via sjoël. Teun zit in groep 8 beej juffrouw Petra en meneer Nando op basissjoël Het Maasveld. ’t Viëre van de Vastelaovend is Teun neet vraemp, want det doon zien elders ouch gaer. Zien oma Jeanne Janssen haet in ’t verleeje ouch hiël get Tegelse vastelaovesliedjes gesjreeve en zien tante Myra Heijnen-Janssen en zienen ome Rob Heijnen zitte beej de Raod & Damesgarde van De Boereraod. Hae haet de Vastelaovend dus mêt de paplaepel ingegaeve gekreege!

Ôs Brüdje Pleun van Woezik is 11 jaor aad en woort gebaore op 13 april 2012 in Tegele as dochter van Jochem van Woezik en Loes Denessen. ’t Haet nag ’n aajere zus Anna (13). Pleun woënt mêt zien gezin op de Groëtesjtraot in ’t centrum van Tegele. Pleun is ’n sjportief maedje, want ’t duit aan atletiek beej Scopias en ’t dans in de Middegroep van V.G. D’n Oeles. Verder sjteit Pleun geregeld in de keuke öm get te bakke, maar ’t hèlt ouch waal van chille mêt vriendinne woë ’t dök mei aafsjprik. Pleun geit, net wie Bróedegôm Teun, nao sjoël in groep 8 beej juffrouw Petra en meneer Nando op basissjoël Het Maasveld. Same hebbe zeej d’r hiël vuël zin in öm de Jeugvastelaoveskèr beej De Boereraod te trêkke.

Teun en Pleun zulle dit jaor same mêt ôs groëte Gangmakers Boy & Fenne en Falke & Elles op zaoterdig 3 fibberwarie, van 17.30 oor toet 20.00 oor, in d’n aaje zaal van de Haandertboerderie eur resepsie haaje. Aansjlóetend is d’r vur de kinger ’nne Jeugvastelaovesdisco en kênne alle volwassene nag naoborrele in de fwajee van de Haandertboerderie.

“Dao kumpse mei binne!”, det kênse waal zêgke mêt dees zes Gangmakers! Viër de Vastelaovend gezellig mêt ôs as Boere mei en loup êns binne beej de Haandertboerderie of in de kefees ôppe Hei!

Vastelaovend Same!

Teddo Peulen (Boerevader),
V.V. De Boereraod van de Hei.