Boerebróedspaar en getuuge 2023
’t Boerebróedspaar Rob Gielen en Franca Peulen woënt op de Maassjtraot op Sjteyl en zien de gruëtse elders van eur zeuns Vince (9) en Raff (7) en dochter Moon (4). Rob (43) is gebaore in Tegele as zoon van Jeu en Riny Gielen-Franssen. Rob haet nag ein broor Marc (44) en ’n twiëlingzuske Karin (43) en is in ’t dageliks laeve regiomanager en MT-lid beej Customs Support Safety Zuid-Nederland in Vênlo. Boerebróed Franca (37) is gebaore ôppe Hei as de dochter van Herm en Erna Peulen-Reijnders en is ’t jôngere zuske van Teddo (38) en aajere zus van Brenda (35) det dit jaor as zien Getuuge de kèr geit meitrêkke. Franca is in ’t dageliks laeve wêrkzaam as juffrouw Nederlands op College Den Hulster in Vênlo. Rob en Franca zien al 21 jaor same. Asse ôppe Hei bös opgegreujd dèn is d’r altiéd waal ein of angere lingk nao De Boereraod, want Rob zien elders waare in 1977 Getuuge en in 1987 Boerebróedspaar. De groëtelders van Franca, Frans en Mia Peulen-Faessen, waare in 1965 ’t Boerebróedspaar.
As Getuuge hebbe Rob en Franca vur Funs Slaats en Brenda Peulen gekaoze. Dees keus is neet zoë verwôngerlik, want Brenda is ’t zuske van Franca. Funs (36) is gebaore in Vênlo as zoon van Paul en Marie-José Slaats-Beckers en as breurke van zus Mieke (39). In ’t dageliks laeve is Funs wêrkzaam as procesmanager beej Bouwmij Janssen in Vênraoj. Brenda (35) is gebaore ôppe Hei en is zoë-as gezag ’t jôngere zuske van ôs Bróed Franca en Boerevader Teddo. Brenda guëf Nederlandse les op ’t Bouwens Van der Boijecollege in Panninge. Brenda en Funs zien 8 jaor same, hebbe twië dochters Maud (3) en Nina (1) en woëne ôppe Bôngerdsjtraot in Tegele.
Jeugboerebróedspaar 2023
As Jeugboerebróedspaar 2023 hebbe weej dit jaor wir ’n geweldig duo gevônge. Bróedegom Noud Kessels (13) is gebaore in ’t gashóes van Vênlo. Noud is de zoon van Roy en Ingrid Kessels-Engelen en is ’t jôngere breurke van zien zusse Isa en Evy. Hae woënt mêt zien gezin op de Nachtegaalsjtraot ônger ôppe Hei. Noud haet as hobbies atletiek beej Scopias en is lid van waterscouting Vênlo. Noud zit in de brugklas van ’t Blariacumcollege in Bliërick.
Ôs Brüdje Madelief Schatorjé (12) is gebaore in ’t gashóes van Vênlo as dochter van Tom Schatorjé en Iris Vercoulen. ’t Haet nag ein jônger breurke Giep. Madelief woënt mêt zien gezin op de Industriesjtraot in Tegele. Madelief is ’n sjportief maedje, ’t voetbalt en dans gaer. ’t Mak gaer sieräöj, duit gaer teikene, sjildere en meziek loestere. Madelief zit in groep 8 van basissjoël De Schalm op Sjteyl.
